ភ្នំពេញ៖ លោក ភា សុភក្រ្តា ឬគ្រូបង្វឹករហស្សនាម ១២០ភាគរយ បានស្ងប់ស្ងាត់ពីអាជីពជាគ្រូបង្វឹកបាល់ទាត់មួយរយៈធំមកហើយ ក្រោយពីលោកបានលាឈប់ពីតួនាទីជាគ្រួជំនួយក្រុមជម្រើសជាតិកម្ពុជា ដែលកាលណោះស្ថិតក្រោមការដឹកនាំរបស់បុរសសញ្ជាតិអាហ្សង់ទីន Felix G.Dalmas។

យ៉ាងណាក្តី គេក៏នៅតែសង្កេតឃើញគ្រូបង្វឹកដឹកនាំក្រសួងការពារជាតិឈ្នះពានសម្តេចតេជោ ហ៊ុន សែន ឆ្នាំ ២០១៨រូបនេះ នៅតែមានការមមាញឹកជាមួយការងារជាអ្នកអត្ថាធិប្បាយបាល់ទាត់អាល្លឺម៉ង់នៅស្ថានីយ៍ទូរទស្សន៍ធំក្នុងស្រុក ព្រមទាំងជាអ្នកវិភាគបាល់ទាត់ដ៏មានប្រជាប្រិយភាពមួយរូបនៅលើហ្វេសប៊ុកផ្ទាល់ខ្លួនរបស់លោក និងផេកកីឡាល្បីៗផ្សេងទៀត រួមជាមួយការមើលខុសត្រូវអាជីវកម្មហាងកាហ្វេធំមួយកន្លែងនៅក្រុងតាខ្មៅផង។

មួយរយៈក្រោយនេះ មានការលេចឮដំណឹងជាបន្តបន្ទាប់ពីការវិលត្រឡប់មកអាជីពលើវាលស្មៅវិញរបស់គ្រូបង្វឹកកម្រិត AFC A-License រូបនេះ ប៉ុន្តែគេនៅមិនទាន់ច្បាស់ពីគោលដៅបន្ទាប់របស់លោកឡើយ ស្របពេលដែលចចាមរ៉ាមជាច្រើនបានលើកឡើងថា លោកអាចនឹងត្រឡប់មកចូលរួមជាមួយក្រុមការងារជម្រើសជាតិឡើងវិញ ឬអាចទៅកាន់ក្លិបធំមួយក្នុងស្រុកគឺវិសាខា។ ក្រុមការងារ E-Arts បានទាក់ទងផ្ទាល់ពីបញ្ហានេះ ប៉ុន្តែលោកសុំមិនទាន់អធិប្បាយច្រើនឡើយជុំវិញបញ្ហានេះ។ ចុះចំណែកប្រិយមិត្ត និងអ្នកគាំទ្រទាំងអស់វិញគិតថា តើអតីតគ្រូបង្វឹកក្រសួងការពារជាតិ ភា សុភក្ត្រា ទៅណា??